علاج النزف الشديد من الجروح

طول الوقت بحاول اركز علي معلومات تفيدني بخصوص الاسعافات الاوليه لانها بتفرق كتير وبخاف اتعرض لموقف مفاجئ ومعرفش اتصرف فيه وادور علي صور للاسعافات الاوليه تحسبا لاي ظرف طارق ممكن يحصل معايا او مع غيري المهم خلاصه الموضوع اني اخير لقيت موضوع شامل لتقنيه الاسعافات والحوادث اللي ممكن يتعرض لها الطفل بشكل خاص وعجبني جداااااااااا ونزلته في المدونه والصفحه من فترة 

الاسعافات الاوليه

وذاكرته كويس زي ما قولتلكم علشان لو حصل حاجه ليا او لطفلي اقدر اتصرف بسرعه

لغايه ما جات اللحظه اللي مفروض اني اطبق اللي ذاكرته وللاسف لقيتني من كتر التوتر اللي انا فيه مش فاكرة غير حاجات بسيطه نظرا لاني مراجعتش علي الموضوع من مدة
اللي حصل معايا بقي هو اني كنت بجهز الاكل ومشغوله جداا تيجي بنتي الصغيرة عمرها 7 سنوات تجرح اصبعها وتنزف بغزارة ولانها بتخاف من منظر الدم طبعا بقت مرعوبه وبقت ترجع وجسمها بقي زي الثلج وانا برضو زيها بقيت خايفه من الدم اللي مش عايز يوقف  برغم ان الجرح مش غائر ولا كبير واحاول افتكر اي طريقه اتعلمتها لوقف النزيف لكن ولا الهواء المنظر كان زي اللي في الصورة بالضبط خط دم مستمر
روحت اول حاجه عصرتلها نقتتين ليمون علي الجرح علي سبيل التعقيم وقولت يمكن يوقف النزف لكنه موقفش افتكرت الثلج رحت حطيت لها قطعه تلج علشان الدم يجلط برضو ولا اثر
افتكرت البن قولت يمكن ينفع كبستلها الجرح بالبن وبرضو الدم شغال مش عايز يوقف وانا توتري بيذيد  واحاول اصبر في بنتي الخايفه فين لما افتكرت ان لازم نرفع الجزء المصاب فوق مستوي قلب الطفل وفعلا الدم بقي ينزل اقل من الاول بس موقفش برضو برغم من اني حطيت لها بيتادين وميكريكروم وسبيرتو لكن برضو شغال اخير ركزت وافتكرت اني نزلت الصور من النت وحفظتها في تليفوني بسرعه روحت قريت فيها علاج النزف الشديد
هو اني زي ما قولتلكم لازم ارفع الجزء المصاب فوق مستوي القلب واضع فوطه او منديل نظيف واضغط لمدة عشر دقائق علي الاقل وفعلا طبقت الكلام المكتوب والحمد لله اخير وقف الدم بعد ما نشف دمي انا
 وفكرت ان مش عارفه لو مكنتش محتفظه بصور الاسعافات الاوليه في تليفوني او مكنش عندي نت ادور فيه علي حل مش عارفه كنت حعمل ايه وبنصح كل انسان انه لازم يكون عنده معلومات عن الاسعافات الاوليه لانها لو مش حتفيدك  انت وبس دي كمان  حتفيد غيرك بيها وتكون سبب في انقاذ حياه انسان